काठमाडौं । प्रचण्ड-माधव पक्षीय नेकपाका प्रदेश १ का मुख्यमन्त्री दाबेदार नेता भीम आचार्यले हिम्मत भए प्रदेशसभा भंग गरेर देखाउन शेरधन राईलाई चुनौति दिएका छन् ।

मुख्यमन्त्री राइले अविश्वास प्रस्तावबाट डराएर प्रदेशसभा भंग हुन सक्ने धम्की दिएको भन्दै आचार्यले त्यो ताकत र अधिकार राईसँग नरहेको बताए ।

काठमाडौंमा पत्रकारहरुसँग कुरा गर्दै आचार्यले अविश्वास प्रस्तावबाट डराएर भागेर ओली पक्षले धम्क्याउने काम गरिरहेको बताए । उनले अल्पमतमा परिसकेका मुख्यमन्त्री राई अब धेरै दिन भाग्न नसक्ने टिप्पणी गरे ।

आचार्यलाई मुख्यमन्त्रीको उम्मेदवार बनाएर प्रचण्ड माधव पक्षले प्रदेशसभामा अविश्वास प्रस्ताव दर्ता गराएको छ । तर राईले नेकपा कानुनी रुपमा विभाजित नभएको भन्दै अविश्वास प्रस्तावको बैधतामाथि प्रश्न उठाएका छन् ।

आचार्यले अविश्वास प्रस्तावको पक्षमा कांग्रेस र जसपाले आफूलाई साथ दिने दावी समेत गरेका छन् ।